「三馬路」係邊一條？

早兩日就分別同史友們介紹完有「大馬路」之稱嘅皇后大道以及「二馬路」嘅堅尼地道，而關於呢類型嘅稱呼，其實仲有個「三馬路」，唔知史友們又知唔知係邊一條呢？

心水清嘅史友可能就會知道，其實阿史所講嘅就係寶雲道。呢條連接住港島半山區至黃泥涌峽一帶、由中環馬己仙峽道，穿過灣仔峽道，再到司徒拔道嘅道路，係以香港第九任總督寶雲命名，而喺呢條路上面仲有一條被列為法定古蹟嘅寶雲輸水道21孔拱券段，同時都有一塊喺1903年立下嘅維多利亞城界碑，可見呢條路真係有返咁上下歷史。

咁問題嚟喇，點解呢條路會被稱為「三馬路」呢？原來寶雲道喺1888年落成果陣，就係繼皇后大道同埋堅尼地道之後，第三條香港島主要嘅道路，於是就直頭叫佢就「三馬路」喇！